كتبت زينب محمد جاد
Zeinab Mohamed Gad
لما اتجوز الشربفة خديجة ابنة نقيب الاشراف احمد كامل باسين كانت زميلته في مدرسة بور سعيد الثانوية وكانت بينهم قصة حب وبعد زواجه منها نسب نفسه لنسل الرسول صلى الله عليه وسلم في الحقيقة انه ليس من نسل الرسول صلى الله عليه ولكنها انتساب لزوجته وهذا توضيح الامر لأن مواقع كتير طالعة تقول انه من نسل الرسول صلى الله عليه وسلم تشوية لصورة الاسلام
والرسول صلى الله عليه ولاسلام برئئين منه ومن افعاله
. وبدأ حياته عازف درامز.. وسيطر على سوق الحديد والسيراميك في ظرف كام سنة.. وكان بيحكم مجلس الشعب بصباعه.. وخلص على كمال الشاذلي.. واتجوز 4 مرات.. واتحكم عليه بالسجن 54 سنة.. وعمر سليمان قاله «إنت اللي هتضيع البلد»..
قصة رجل الأعمال أحمد عز
اتولد سنة 59.. وأبوه كان لوا في الجيش.. وأمه من أصول فلسطينية.. ودرس في كلية الهندسة.. وكمل تعليمه في ألمانيا.
وقصتهم مع البزنيس ابتدت لما أبوه.. اللوا عبدالعزيز عز.. طلع معاش بعد نكسة 67 في قضية عبدالحكيم عامر.. وبعلاقته مع الرئيس عبدالناصر قدر يشتغل في التجارة وخد حصة من توزيع الحديد في السوق وحصة من توزيع المواسير.. وكان بيورد للجيش.
و"أحمد" من صغره بيحب التجارة.. وكان دايما بيروح مع والده اول محل فتحوه في منطقة السبتية "مملكة الخردة في مصر"..
بس برضه كان بيحب يدلع نفسه وعامل فرقة مزيكا مع حسين ومودي الإمام اسمها "فرقة طيبة"..
و"عز" كان عازف درامز..
وبعد ما اتخرج من الجامعة ساب المزيكا وابتدى الشغل بجد.. وهنا بتحصل النقلة الأولى في حياتهم.. لما حصلت قضية شهيرة في مصر اسمها "قضية الحديد المغشوش" واتقبض على معظم تجار الحديد.. إلا أبوه.
وبكدا السكة بقت مفتوحة أداهم.. وبيعمل أحمد أول صفقة حقيقية وبيجيب ألفين طن حديد وبيستغل إن السوق عطشان وبـ يبيع بـ600 ألف جنيه.
وبيدخل بالفلوس دي في تجارة العملة.. لكن المباحث بتعرف بالنشاط وزكي بدر، وزير الداخلية وقتها، بيطلع أمر باعتقال عبد العزيز عز والتحقيق مع ابنه "أحمد" واتصادر نص مليون دولار من فلوسهم.
وفجأة القضية بتتحفظ وكله بيطلع براءة.
وبعدها بيقرر أحمد عز يدخل في الصناعة وبياخد قروض بمليار و600 مليون من البنوك وبيعمل مصنع العز لحديد التسليح.. وبينجح.. وبيعمل كمان شركة "الجوهرة" للسيراميك.. وكانت وش السعد عليه.. وبيشتغل في الصلب.
والنقلة الكبيرة لما خد شركة الدخيلة للحديد والصلب.. واتقال إن هو اللي خرب الشركة عشان يشتريها بعد كدا بملاليم.
وبندخل التسعينات وأحمد عز من أغنى رجال الأعمال.
وف نفس الفترة بيرجع جمال مبارك من برا ويبتدي يشتغل في السياسة والبزنيس.
وبيتعرفوا على بعض وبيعملوا "حلف التغيير"..
وواحدة واحدة الاتنين سيطروا على الحزب الوطني وخلصوا على الحرس القديم زي كمال الشاذلي وصفوت الشريف وزكريا عزمي.
لدرجة إن كمال الشاذلي قبل ما يموت سنة 2010 قال "مصر هيضيعها اتنين.. الطويل والقصير".
والطويل كان أحمد نظيف رئيس الوزرا.. والقصير أحمد عز.
بس أحمد عز ولا همه.. وكان طالع بسرعة الصاروخ.. وبقى رقم 2 في البلد بعد جمال.. ويدوب يرفع إيده في مجلس الشعب تلاقي المجلس كله رفع.
وفلوسه زادت وبقى "نمبر 1" الحقيقي.
لكن بيعمل أكبر غلطة في حياته سنة 2010 لما قرر يزور الانتخابات بالكامل ومفيش ولا واحد من المعارضة بينجح.
ووقتها ناس من جوا النظام مكنش عاجبها اللي حاصل.. واللوا عمر سليمان مدير المخابرات العامة اعترض وقاله: انت كدا بتهد الدنيا..
مجلس الشعب ده الشباك اللي المعارضة والناس بيتكلموا فيه..
لو قفلت عليهم الشباك هيتكلموا في الشارع.
وأحمد عز بيتحدى ويقوله: "آسف يا سيادة اللوا.. الفترة الجاية مصيرية ولازم المجلس يبقى متسيطر عليه بالكامل".
وكان يقصد نقل الحكم لجمال زي ما كان متخطط.
وكانت دي الغلطة الحقيقية.. وبتنفجر الأوضاع في 25 يناير. وبيبقى أحمد عز أول ضحية.
وبيتحبس فورا.. وبيتعمله 3 قضايا.. وبياخد فيهم مجموع أحكام تعدي الـ54 سنة. وبيقضى 1275 يوم في السجن قبل ما يخلى سبيله بكفالات 250 مليون جنيه.. ودي أغلى كفالة في تاريخ مصر.
وبعدها بيبتدى يتصالح في قضايا وبيدفع مبالغ توصل لـ2 مليار جنيه.. وبتتلغى الأحكام اللي صادرة ضده.
وشوية شوية رجع تاني لإمبراطوريته وسيطر أكتر على سوق الحديد.
والسر إن أحمد عز تختلف أو تتفق معاه "رجل صناعة" من طراز نادر.
وعشان كدا مصانعه وشركاته فضلت شغالة حتى وهو مش موجود. وكانت بتديرها بنته "عفاف".. وهي كمان "بيزنيس وومان" زي الكتاب ما بيقول.
وأحمد عز عنده بنتين "عفاف" و"ملك" وابن وحيد اسمه "أحمد". واتجوز 4 مرات
الأولى"الشريفة خديجة" بنت نقيب الأشراف أحمد كامل ياسين.. زميلته في مدرسة بورسعيد الثانوية.. اللي عاش معاها قصة حب واتجوزوا وخلفوا بنتين.
وكان طبيعي بعدها ياخد شهادة بإنه من نسل الرسول صلى الله عليه وسلم.
ورغم كدا دخل في قصة حب جديدة من السكرتيرة بتاعته "عبلة فوزي" واتجوزها في السر
والموضوع متعرفش إلا لما خلف ولد وسماه "أحمد".
والجوازة التالتة برضه كانت في السر ومستمرتش كتير ومخلفوش.
والحب الحقيقي بقى هي "شاهيناز النجار" أجمل نائبة في تاريخ البرلمان.. ومهرها كان 25 مليون جنيه والشبكة خاتم بمليون.. وعاشوا في أغلى شقة في مصر ف "الفروسيزون".. وهي سابت مجلس الشعب عشانه.
ورغم العشرة الطويلة؛ في إشاعات منتشرة دلوقتي عن جوازه من
سيدة لبنانية!
والنهارده ثروة المهندس أحمد عز تعدي ١٠٠ مليار.. بعد ٤٠ سنة ف البزنس.. ومع ارتفاعات الدولار الأخيرة فلوسه زادت جدا لدرجة إنه كسب ١٠٠ مليون دولار في ٩ أيام بسبب ارتفاع سعر سهم شركة من شركاته.
https://www.facebook.com/share/p/19WKigxTFE/
Keine Kommentare:
Kommentar veröffentlichen